Sa pung cinta datang di hati yang salah

Judul: Sa pung cinta datang di hati yang salah

_Sa su capek. Capek jaga rasa yang ko sudah tidak pernah hargai. Ko bilang sayang, tapi ko kasih tinggalkan sa dengan janji kosong. Maret lalu, sa masih sabar. Sa masih tahan waktu ko marah, waktu ko diam-diam menghilang, waktu ko jawab pesan satu-dua hari kemudian.

Sa bertanya dalam hati: " mungkin, ko lagi sibuk."
Sa bertanya dalam hati: "Mungkin ko ada perlu Waktu untuk istirahat."

Tapi lama-lama... luka ini jadi perih.

Sa coba jaga sabar, tahan emosi. Tapi jujur, nyong e, kali ini... sa tidak tahan deng ko pun tingkah.

Kemarin sa lihat ko dengan dia. Senyum yang ko kasih ke dia... itu senyum yang dulu sa tunggu-tunggu tiap sore. Tangan yang ko genggam... itu tangan yang dulu sa pikir cuma untuk sa.

“Mau bilang sayang, memang sa sayang koi paskali...”

Tapi, kenapa su ada dia di ko pung hati?
Waktu itu sa cuma berdiri diam di pinggir jalan. tidak ada suara keluar dari mulut. Cuma dada yang sesak, mata yang mau turun airnya tapi sa tahan. ko lihat sa, ko kaget. Tapi ko tidak kejar. ko putar balik, jalan terus... sama dia.

"Mulai dari sekarang... sa tidak akan ganggu ko lagi," bisik dalam hatiku.

Bukan karena sa tidak sayang. Tapi karena sa sadar... ko cuma singgah, sementara lalu jalan deng pilih tujuan.
Mungkin ini memang Tuhan pung jalan. Par bilang, sa pung cinta datang di hati yang salah.

Dulu sa pikir, sa bisa jadi bahu tempat ko bersandar, waktu ko capek, waktu ko jatuh. Tapi sekarang sa sadar: ternyata sa pung bahu bukan ko pung tempat sandar.

Sa jalan pulang malam itu, tidak bawa apa-apa selain luka. Tapi ada juga rasa lega. Karena akhirnya sa lepas orang yang tidak pernah genggam sa dengan baik dan nyaman.

Dan di antara bintang-bintang malam itu, sa janji...
Besok Mentari pagi nanti, sa akan belajar ulang, bagaimana caranya cinta diri sendiri dan tra kasih harapan kepada seseorang lagi.